ചിറക്
------------
എന്റെ സ്വപ്നത്തിന്
പ്രായം ഇരുപത്തിയൊന്ന്
(ശരീരത്തിന് അതിലും കൂടും)
സ്വപ്‌നങ്ങൾ എന്റെയുറക്കം
കെടുത്തിത്തുടങ്ങിയിരിക്കുന്നു
ഇരുട്ടിന്‍റെ മേലാകെ
ഞാൻ നിറമുള്ള
ചിത്രങ്ങൾ കോറിക്കൊണ്ടേയിരുന്നു
എന്തോ
ഇരുട്ടിനെന്നെ ഇഷ്ടമായി.
എന്റെ ചിന്തകൾക്കിപ്പോൾ
പറക്കാനാണ്‌ മോഹം,
സ്വപ്നത്തിലും ഞാൻ കണ്ടത്
രണ്ട് ചിറകുകളായിരുന്നല്ലോ, പക്ഷെ
ഇനിയും ചിറകു മുളയ്ക്കില്ലെന്നവർ
അടക്കിയ ചിരിയോടെ പറഞ്ഞു
കൺസൾട്ടിങ് ഫീ വാങ്ങിയ ശേഷം
മരുന്നിന് കുറിപ്പടിയും തന്നു,
‘രാത്രി, ഭക്ഷണത്തിനു ശേഷം,
സ്വപ്നം കാണുന്നതിന് മുമ്പേ, ഓരോന്ന്’.
മരുന്ന് ഫലിച്ചു
എനിക്കിപ്പോൾ
പത്തുനിലയുള്ള കെട്ടിടത്തിന്
മുകളിൽ നിന്നു വരെ
താഴേക്ക് പറക്കാൻ കഴിയും
ഭൂമിയുടെ ആത്മാവിലേക്ക്!
No comments:
Post a Comment